 |
| |
| |
| Sa Isang Salita: 'Sa Ibaba' ni Msgr. Noel |
| 19 September 2021 |
| |
|
Sabi ng ilan, mahirap daw maging lider. Palagi kang mapag-iisa. "It's lonely to be on top," sabi nila.
Pero hindi pag-akyat sa trono, kundi pagtungo 'sa ibaba' ang uri ng pamumuno na niloob ni Hesus. "Ang sinuman sa inyo ang ibig maging dakila ay dapat maging lingkod. At sinumang ibig maging pinuno ay dapat maging alipin ng lahat."
Ang tunay na lider ay wala sa itaas ng kanyang mga pinaglilingkuran kundi kaisang-buhay nila. Sabi ni Papa Francisco, ang pastol ay dapat makasing-amoy ng kanyang mga tupa. Ito ang kahulugan ng 'ministeryo' - nagmula sa wikang Griego na 'diakonia', na ang kahulugan ay paglilingkod.
Ipinahayag ni San Agustin ang kahulugan ng Kristiyanong pamumuno nang sabihin niya: "For you, I am a bishop; with you, I am a Christian." Ang una ay pananagutan; ang ikalawa ay karangalan.
Sabi ni P. Dionisio Miranda, may tatlong antas ng pagtingin sa ating trabaho:
1) hanapbuhay (job) - ang pangunahing layunin ng paggawa ay para makatanggap ng sahod;
2) gawain (profession) - sa pagsunod sa tawag sa tungkulin, umuunlad tayo sa ating buhay-propesyonal;
3) tawag (vocation) - higit pa sa sahod at sa paagtupad sa tungkulin, ang trabaho ay isang ekspresyon ng mapagmahal na paglilingkod sa kapwa.
Anumang uri ng trabaho ay isang bokasyon. Tinatawag tayo na maglingkod hindi lamang dahil sa sahod o sa pansariling pag-unlad, kundi upang itaguyod ang kabutihan ng madla.
Ngayong panahon ng Covid19 pandemic, kailangan nating maging tunay na lingkod sa isa't isa, handang dumamay at lumingap. Nawa'y ang krisis na ito ay maging sandali ng paglago sa ating pagkatao sa pamamagitan ng paglilingkod, at hindi isang oportunidad para magsamantala sa paghihirap ng kapwa.
Hindi dapat tatsulok ang hugis ng istruktura sa lipunan, na habang ang ilan ay nasa tuktok, ang karamihan ay nagdarahop. Ang tapat na pamumuno ay ipinamalas ni Hesus. "Naparito Siya upang maglingkod at hindi upang mambusabos."
"When the power of love overcomes the love of power, there will be peace."
*Ikadalawampu't limang Linggo ng Karaniwang Panahon |
|
| |
|
|
|
| |
| |
|
| |
|
| |
|
|
