 |
| |
| |
| Sa Isang Salita: 'Lupa' ni Msgr. Noe |
| 23 October 2022 |
| |
|
Ang mga salitang 'humanity' at 'humility' ay galing sa katagang Latin, 'humus,' na ang kahulugan ay 'lupa.' Magkaugnay ang dalawa hindi lang sa pinagmulang salita kundi pati sa kahulugan nito sa buhay: the way to be human is to be humble. Ang daan sa pagpapakatao ay pagpapakababa. Magkaiba ang daang tinahak ni Adan at ni Kristo: tinakasan ni Adan ang kanyang pagka-Tao sa paghahangad maging kaparis ng lumikha; niyakap naman ni Kristo ang ating pagkatao sa kanyang pagpapakumbaba. "He emptied himself and took the form of a slave."
Sa ebanghelyo, umuwing kalugud-lugod sa Diyos ang Publikano (makasalanan) dahil sa pagtanggap sa kanyang kawalan sa harap ng Diyos. Ginawak niya hindi ang balabal kundi ang kanyang pusong nagsisisi. Samantala, tinakpan ng Pariseo ang kanyang kahinaan at pinaramtan ng pagbibigay puri sa kanyang sarili.
May gawi tayong hatulan ang tao sa kanyang panlabas na anyo. Kaya nga, kahit sa mga kandidato sa eleksyon, mas mahalaga ang 'packaging' kaysa sa track record at credentials. Gamitin nating ang pamantayang maka-Diyos sa pagkilatis ng katangian ng mga namumuno: puso at hindi anyo ang nagsasabi ng totoo sa tao.
Mapapawi ang ating paghanga sa taas ng lipad ng lobo sa papawirin kung ating mababatid na wala itong laman kundi hangin.
Sabi ni Henri Nouwen, kung paanong dapat basagin ng araro ang tigang na lupa upang mapasok ng tubig na sagana, kailangan ding basagin ng pagsisisi ang ating pusong pinatigas ng pagmamataas.
*Ikatatlumpong Linggo sa Karaniwang Panahon |
|
| |
|
|
|
| |
| |
|
| |
|
| |
|
|
