 |
| |
| |
| Sa Isang Salita: 'Apoy' ni Msgr. Noel |
| 28 May 2023 |
| |
|
Ang apoy ay sagisag ng presensya. Sa Lumang Tipan, haliging apoy ang nagpahiwatig ng pananatili ng Diyos sa gitna ng kampamento ng mga Israelita doon sa ilang. Matapos na si Hesus ay umakyat sa langit, ang Espiritu Santo ay bumaba sa mga apostol sa anyo ng mga dilang apoy.
Sa pagpanaog ng Espiritu sa unang Simbahan, nabigyan tayo ng katiyakang kasama natin ang Diyos hanggang sa wakas ng panahon.
Ang apoy ay sagisag ng paglilinis. Ang ginto ay sinusubok sa apoy upang alisin ang karumihan at lumitaw ang taglay nitong kinang. Ang mga Kristiyano ay pumapailalim sa binyag ng tubig at Espiritu upang linisin sa kanilang kasalanan.
Hinahamon tayo ng Banal na Espiritu upang iwaksi ang lumang pamumuhay na ayon sa laman, at mamuhay nang may dangal ayon sa espiritu. Hayaan nating pugnawin ng Espiritu Santo ang anumang bagay na taliwas sa diwa ni Kristo.
Ang apoy ay sagisag ng alab ng pag-ibig. Ngayong Kapistahan ng Pentekostes, ang huli at ika-50 araw ng Panahon ng Pagkabuhay, pag-alabin natin ang ningas ng apoy ng pag-ibig sa ating mga puso. Ang Espiritu Santo ang Pag-ibig ng Ama at ng Anak. Binibigyan nito tayo ng kakayahang magmahal nang walang kondisyon tulad ng pagmamahal ng Diyos sa atin.
*Linggo ng Pentekostes, Ikalimampu at huling araw ng Panahon ng Pagkabuhay |
|
| |
|
|
|
| |
| |
|
| |
|
| |
|
|
