 |
| |
| |
| Sa Isang Salita: 'Busilak' ni Msgr. Noel |
| 07 October 2023 |
| |
|
Ibang mangatwiran at mag-isip ang mga bata. Walang sinisino. Sinasabi nila ang nilalaman ng kanilang puso. Dalisay at busilak ang kanilang hangarin. Hindi sila nagkukunwari. Ipinapahayag nila ang sa tingin nila ay tama o mali.
Winika ni Hesus sa ebanghelyo, "Ama, nagpapasalamat ako sa iyo, sapagkat inilihim mo ang mga bagay na ito sa mga pantas, at inihayag sa may kaloobang tulad ng sa bata."
Isang panalangin (halaw sa ilang hanay ng panalangin ng isang ministro sa Kansas Senate) ang nagpahayag ng ganito:
"Makalangit na Ama, lumalapit kami sa iyo at humihingi ng kapatawaran. Naligaw kami ng landas at binaliktad namin ang aming mga pagpapahalaga..."
"Pinagsamantalahan namin ang mga dukha at tinawag itong 'lotto' o 'jueteng'... Kinaligtaan naming disiplinahin ang mga kabataan, at tinawag itong 'makabagong paraan'; Inabuso namin ang kapangyarihan at tinawag itong pulitika";
"Pinagnasaan namin ang pag-aari ng iba at tinawag itong 'ambisyon'; Sinira namin ang kalikasan at tinawag itong 'kaunlaran.' Pinagtawanan namin ang kabastusan at tinawag itong "malayang pamamahayag."
Walang pagtatago sa likod ng itinuturing na 'dunong' ng mundo ang may kaloobang tulad ng sa bata. Hindi sila nangingiming isiwalat ang katotohahan.
Tulad ng mga bata, taglayin nawa natin ang karunungang maka-Diyos at mamutawi sa ating mga labi ang katotohanan.
*Sabado sa Ikadalawampu't Anim na Linggo sa Karaniwang Panahon |
|
| |
|
|
|
| |
| |
|
| |
|
| |
|
|
