 |
| |
| |
| Sa Isang Salita: 'Yakap' ni Msgr. Noel |
| 27 December 2023 |
| |
|
May kakaibang larawan ang sanggol sa Belen ng isang simbahan. Ang mga kamay ni Hesus ay nakadipa, na parang may niyayakap. Ang paliwanag ng gumawa ng larawan: sa pasimula pa lang ng pagsilang ni Hesus, niyakap na niya ang kaabahan ng ating makataong pag-iral. "God has assumed what He did not have, our humanity, so that He can give us what we do not have, His divinity."
Mula sa sabsaban, dinadala tayo ng ebanghelyo sa libingan. Sa loob ng Oktaba ng Pasko, ipinapaalaala ng Kapistahan ni San Juan Ebanghelista (Disyembre 27) ang kahulugan ng misteryo ng Pasko. Sa gitna ng masayang pagdiriwang ng pagsilang ng Mananakop, ipinapahayag ng Simbahan na ang tugatog ng misyon ng Mesias ay ang pag-aalay ng buhay sa krus. Sa kanyang kamatayan, nagkaroon tayo ng bagong buhay.
Ang buong ebanghelyo ni Juan ay sinulat upang ipahayag ang katotohanang ito. "Nakita ng minamahal na alagad ang libingan, at siya ay nanalig." Sa harap ng di malirip na hiwaga ng Pasko ni Kristo, nawa ang ating buhay ay maging buhay na ebanghelyo na magpapatotoo sa tagumpay ng Diyos sa kamatayan at sa kasalanan.
*Disyembre 27, Kapistahan ni San Juan Ebanghelista, Oktaba ng Pasko ng Pagsilang |
|
| |
|
|
|
| |
| |
|
| |
|
| |
|
|
