 |
| |
| |
| Sa Ibang Salita ni Msgr. Noel |
| 02 April 2026 |
| |
|
Lingkod. Sa paghuhugas ng paa ng kanyang mga alagad, isinalarawan ni Hesus sa simbolikong pagkilos ng pag-ibig ng Diyos. Ang Diyos 'mula sa kaitaasan' ay nagpakita ng kadakilaan sa kapakumbabaan ng isang lingkod.
Ayon kay San Pablo, hindi lang isa, kundi dalawang hakbang, ang pagpapakababa (kenosis) na ginawa ni Hesus: una, nang siya ay magkatawang tao at, ikalawa, nang siya'y maghain ng buhay sa Krus.
"The foot washing is a sign of the ultimate subversion of all human authority." Sa pagpapakumbaba ni Hesus, isinisiwalat ang kawalang halaga ng ating paghahangad na laging maging 'una,' at angat sa iba.
Sa kabalintunaan, itinuro ni Hesus ang pag-ibig na hindi naghihintay ng lugod sa sarili. Bago siya lumisan, ang iniutos Niya sa mga alagad: magmahal sa kapwa 'tulad' ng ginawa Niya.
Ang utos ng pag-ibig ang nasa likod ng kanyang utos noong Huling Hapunan: Gawin ninyo "ito" bilang pag-aalaala sa akin... Ibig sabihin, mapapanatili natin ang alaala ni Kristo - hindi lang sa pamamagitan ng ritwal ng pagsamba sa Diyos - kundi sa paglalaan ng buhay sa Kapwa, na siyang diwa at buod ng Eukaristiya.
*Huwebes Santo, Simula ng Triduo Pascual |
|
| |
|
|
|
| |
| |
|
| |
|
| |
|
|
